गोरखामा दुई बस ठोक्किँदा पाँच जना घाइते
गण्डकी गाउँपालिकाको गैरीचौतारामा दुई बस एकापसमा ठोक्किएर दुर्घटना हुँदा पाँच जना घाइते भएका छन् ।
काठमाडौंबाट गोरखातर्फ आउँदै गरेको ग१ख ८६०६ नम्बरको बस र गोरखाको भच्चेकबाट काठमाडौंतर्फ जाँदै गरेको ग२ख ९८३ नम्बरको बस शनिबार एकापसमा ठक्कर खाएर दुर्घटना भएको प्रहरीले जनाएको छ ।
दुर्घटनामा गण्डकी गाउँपालिकाका १० वर्षीय भरत वराम, शहिद लखन गाउँपालिकाको नाम्जुङकी २३ वर्षीय कृतिका तिवारी, ३० वर्षीय सविना श्रेष्ठ, गण्डकीका ६२ वर्षीय मनबहादुर श्रेष्ठ र शहिद लखन गाउँपालिकाको बसन्तीगाउँकी ३५ वर्षीया सुमित्रा श्रेष्ठ घाइते भएका छन् ।
घाइतेमध्ये भरत वराम र सुमित्रा श्रेष्ठलार्ई स्थानीय मेडिकलहलमा उपचार गरी थप उपचारका लागि काठमाडौं रेफर गरिएको छ । तीन जना घाइतेको भने प्रदेश अस्पताल गोरखामा उपचार भइरहेको जिल्ला प्रहरी कार्यालय गोरखाका डीएसपी राजकुमार श्रेष्ठले बताए ।
पृथ्वी राजमार्गअन्तर्गत कृष्णभीरको सडक भासिएपछि बेनिघाट हुँदै फुजेलको बाटो भएर यातायातका साधन चलिरहेका छन् ।
प्रतिक्रियाहरू (0)